Орталықта басқа мемлекеттік арнаулы білім беру ұйымдарында оқитын және/немесе  үйде оқитын балаларды қоспағанда, туғаннан 18 жасқа дейінгі психофизикалық дамуында кемістігі бар балалар мен жасөспірімдерге кешенді психологиялық – педагогикалық және медициналық – әлеуметтік көмек көрсетеді.

          Орталық білім беру ұйымдарының мамандары мүмкіндігі шектеулі балаларды оқыту, дамыту және тәрбиелеу мәселелері бойынша консультациялық – әдістемелік көмек көрсетеді.

     Нұр-Сұлтан қаласы әкімдігінің «№2 Оңалту орталығы» коммуналдық мемлекеттік мекемесі (бұдан әрі – Мекеме) білім беру функцияларын жүзеге асыру үшін ұйымдық-құқықтық нысанында құрылған, заңды тұлға мәртебесіне ие коммерциялық емес мекеме болып табылады және кешенді психологиялық – педагогикалық және медициналық – әлеуметтік көмек көрсетеді.

      Мекеме Астана қаласы әкімдігінің 2005 жылғы 18 сәуірдегі №3-1-284қ қаулысының негізінде құрылған.

      Мекемені басқаруды жүзеге асыратын орган «Нұр-Сұлтан қаласының Білім басқармасы» мемлекеттік мекемесі (бұдан әрі – уәкілетті орган) болып табылады.

    Мекеме өз қызметінде Қазақстан Республикасының Конституциясын, Қазақстан Республикасының «Қазақстан Республикасының жергілікті мемлекеттік басқару және өзін-өзі басқару туралы», «Мемлекеттік мүлік турлы», «Білім туралы», «Қазақстан Республикасының бала құқығы туралы», «Мүмкіншіліктері шектелген балаларды әлеуметтік және медицина- педагогикалық түзете қолдау туралы» заңдарын, Қазақстан Республикасының басқа да нормативтік – құқықтық актілерін және Жарғыны басшылыққа алады.

    Мекеме қызметінің мәні кемтар балалардың қоғам өміріне басқа азаматтармен бірдей араласуына жағдай жасауға бағытталған және тіршілік әрекетіндегі шектеулерді болдырмау және өтеу үшін жағдай жасауды қамтамасыз ететін мәселелерді кешенді шешуді қамтамасыз ету болып табылады.

    Мекеме қызметінің мақсаты мектепке дейінгі, мектеп және жасөспірім жастағы балалардың даму ерекшелігін дер кезінде түзету көмек көрсету.

    Мекеме мақсатқа қол жеткізу үшін мынадай қызмет түрлерін жүзеге асырады:

  1) сөйлеу, көру,есту, тірек-қимыл аппараты бұзылған, сондай-ақ оқуы, қарым-қатынасы және мінез-құлқы қиын балалар мен жасөспірімдерге психологиялық-педагогикалық түзеу және оңалту түріндегі кешенді психологиялық-медициналық-педагогикалық көмек көрсету;

2) дамуы, оқуы, қарым-қатынасы, мінез-құлқында проблемасы бар түрлі топтағы балаларға қолданылатын жаңа психологиялық-педагогикалық технологияларды әзірлеу, сынақтан өткізу, енгізу;

3) пән аралық мамандар командасының бала мәселесін кешенді зерделеу (командалық бағалау) және баланың медициналық, психологиялық, түзету-педагогикалық және әлеуметтік көмекке қажеттілігі мен мүмкіндігін белгілеу;

4) ата-аналарды (немесе басқа заңды өкілдері) кемтар балаларды отбасында тәрбиелеу мәселері жөнінде ақыл кеңес беру және оқыту.

  16 жыл  жұмысы уақыт кезеңінде  Оңалту орталығында Нұр-Сұлтан қаласының психологиялық-медициналық-педагогикалық комиссиясының (ПМПК) бағытымен келген   ерекше білім беруді қажет ететін 14 мыңнан астам бала мемлекеттік қызметтерді алды.

Жыл сайын емдік-түзетуді  қажет ететін балалардың саны артып келеді, бұл ең алдымен балалардың денсаулығын ерте диагностикалаумен, халықтың шалғай елді мекендерден елордаға көшуімен байланысты, мұнда уақтылы білікті қажетті көмек көрсететін мекемелердің көптігі себепші.

Бүгінгі таңда мекемені Накыпова Венера Бугибаевна басқарады, ол мекеме ұжымының арнайы білім беру саласындағы үздіктер қатарынан көрінуіне көп күш салуда: ұстаздар халықаралық, республикалық және қалалық іс-шараларға үнемі қатысып отырады.

Ол орталықта  ұжымның шығармашылық жұмысына қолайлы жағдай жасап келеді. Ұзақ жылдар бойы әдіскер Сураганова Сауле Мейрамовна орталық мамандарына, әсіресе жас ұстаздарға әдістемелік жұмыста үлкен көмек көрсетіп келеді. Әрбір арнайы білім беру мұғалімі ерекше білім беруді қажет ететін балаларға не қажет екенін біліп, осы балалардың болашағына және олардың қоғамда дұрыс дамуына барынша үлес қосуы керек.